簡單。芒果吉士拿破侖酥餅
昨日收工到上水買好些酥皮，準備教朋友做蝴蝶酥餅！可惜因事取消了😅忽然被這裡的一位朋友問到，這酥皮可否做拿破侖？當然無問題啦😋
所以，今日就簡單做個拿破侖啦！連我都係第一次整咋，想就想咗好耐囉！覺得好簡單啫：焗酥皮，打吉士，就係咁多！
材料
。酥皮一塊，我只用了四份三，大家可以做四層的！
。芒果約六粒，我用咗腰芒，貪佢無咁多水份，唔怕整到吉士濕轆轆！起肉切小粒備用！
。吉士醬，可以買粉開的或自己整！
吉士醬做法:
。蛋黃，3隻
。沙糖，3湯匙
。忌廉，200ml
。粟粉，4茶匙
。將蛋黃，沙糖，粟粉拌勻備用
。用中火將忌廉煮至暖身微熱，加入蛋糊中攪勻，再倒入煲中用中火加熱，不停攪拌至杰身，離火繼續攪拌，待涼後放雪櫃備用！
焗酥皮要注意的地方：
。酥皮解凍後，要用叉或像我用釘轆在酥皮面上打上無數的小孔，那酥皮在焗的時候才不會像充氣一樣谷起，而且內層的酥皮才會焗得更香脆！
。預熱焗爐200度，焗大約20分鐘或金黃色，取出待涼備用！
做法
。搽一層吉士醬後，加入一層芒果肉，然後如此類推再做一層，最後在面層撒上糖霜😋
Search